十。八 爸B生日

吖，唔記得post番妹妮畫比爸B張生日卡潻！

其實爸B生日正日媽me要去上海，我地早一晚慶祝。爸B生日係星期二，本來想星期日提早去Morton's，但爸B一直唔舒服，於是呢日都係留係屋企食。叫yaya買左D鮮蝦，同埋包左爸B最鐘意食既餃子

妹妮既甜心爹哋生日，佢都好開心。妹妮日日爹D呀，爹D呀咁冤住爸B。但係爸B就好鬼鐘意妹妮咁冤住佢。睇下妹妮一邊錫住都不忘一邊豎起兩隻手指仔

小不了得全家幅，呢晚D蝦好好味呀，妹妮自己都食左十隻有多！佢好鐘意食蝦架！！

呢日買左Ms B蛋糕

黑白格仔襯晒男人啦

妹妮好似比爸B興𡚒呀，佢隻V手指又自動出黎了

個蛋糕好靚呀！！其實有幾個唔同款既可以揀，而呢個係butter cake，可能爸B未必咁鐘意食，但係又有芝麻味好似幾吸引，於是試下啦。賣相真係一流架，賞心悅目呀！

個蛋糕太靚了，容許我地影多幾張相 ：P

妹妮岳高晒頭咁錫爸B，冧到暈呀

爸B今年既願望係媽me對佢溫柔d喎! 哦，好易啫 hehehehe 祝爸B係願望成真啦

 撇開好唔好食，個蛋糕好似要用好多心機先可以砌成咁。雖然自己都幾有興趣整下蛋糕，甜品，但叫我自己整真係好難成事，錢就係要比人賺的。

每次妹妮見到蛋糕都當正自己生日咁，當然要親自切蛋糕同吹焟爉啦

切開入面都係黑白格仔架！

壽星佬食番啖生日蛋糕先

可能爸B麻麻地鐘意butter cake，佢鐘意海綿蛋糕多D，爸B居然話味道似美心D件裝西餅囉 -_-"

唔緊要，蛋糕唔夠吸引仲有朱古力！Godiva寄左張生日咭送左15粒朱古力，就用黎借花敬佛

點知又係益左妹妮。。。